Zëvendësdrejtori Muarem Asani dhe përfaqësues të Drejtorisë së doganave dje kanë mbajtur një takim pune me përfaqësues të lartë të Zyrës për Asistencë Teknike në Ministrinë e Financave të SHBA-ve.
Qëllimi i takimit ishte identifikimi i fushave me interes për Drejtorinë e doganave për të cilat Zyra për Asistencë Teknike mund të ofrojë asistencë teknike dhe ndihmë eksperte, si aktivitet i radhës në kuadër të mbështetjes së vazhdueshme afatgjatë që marrim nga Shtetet e Bashkuara përmes projekteve të ndryshme.
Gjatë takimit u prezantuan rezultatet e arritura deri më tani nga aktivitetet e ndërmarra për dixhitalizimin dhe modernizimin e operacioneve doganore, si dhe aspektet kyçe për zhvillimin e mëtejshëm të Doganës, me synim mbledhjen më të mirë të të hyrave, përmirësimin e shërbimeve për operatorët ekonomikë dhe mbrojtjen e shoqërisë. Në këtë drejtim u diskutuan masat e mundshme parandaluese, trajnime dhe shkëmbim përvojash për forcimin e integritetit të punonjësve, kontrollin efikas, parandalimin e ekonomisë gri dhe luftën kundër mashtrimit.
