Kryetari i Bashkimit Demokratik për Integrim, Ali Ahmeti ka kujtuar në 33 vjetorin e rënies heroike, veprimtarët e çështjes kombëtare Afrim Zhitinë dhe Fahri Fazliun.
“Dy shokë që në rrugët e jetës i bashkoi ideali i lirisë, Afrim Zhitia dhe Fahri Fazliu me atdhedashurinë, guximin, vigjilencën e veprimit dhe flijimin për përjetësinë e Kosovës, do të bëhen rrezatim frymëzues për breza të tërë veprimtarësh në epopenë e qëndresës së saj heroike. Sot kur bëhen plot 33 vjet nga rënia e tyre, i kalitur me krenari në mendjet dhe zemrat tona qëndron kujtimi për personalitetin e tyre revolucionar dhe intelektual që e vendosën në shërbim të kauzës së drejtë të kombit. Qoftë i paharrueshëm kujtimi për Afrim Zhitinë dhe Fahri Fazliun! Lavdi e përjetshme të gjithë dëshmorëve të kombit!” – ka shkruar Ali Ahmeti në faqen e tij në rrjetin social Facebook.
