Frikë e madhe mëngjesin e kësaj të mërkure në rajonin e Ankonës në Itali.
Lëkundja e fortë e tokës me magnitudë 5.7 ballë me epiqëndër në Marche, Pesaro në orën 07:07 ka tmerruar banorët.
Kryebashkiaku i Pesaros shprehu frikën e tij nga pasojat e këtij tërmeti të fortë.
“Po kryejmë kontrolle, shumë njerëz janë në rrugë dhe për momentin nuk ka dëme të konsiderueshme por po bëjmë të gjitha kontrollet e mundshme në të gjithë ndërtesat, sepse goditja ishte e fortë dhe prandaj kemi frikë nga pasojat”.
Banorët në Fano, zonë në qëndër të tërmetit treguan përjetimet e para të frikës së madhe nga lëkundja e parë e fortë.
“Dritat e rrugëve të ndriçimit publik lëkundeshin si thupra, gjithçka dridhej fort, një ndjesi e tmerrshme dhe njerëzit u derdhën në rrugë”. Kështu ka thënë një banor i Fanos (Pesaro Urbino) menjëherë pas lëkundjeve.
Në Palazzo delle Marche, selia e Asamblesë Legjislative, disa pjesë suvaje ranë në zyra, ndërsa stafi i Këshillit të Qarkut Marche u lajmërua të qëndronte në shtëpi.
Edhe në Rimini tronditja u ndje qartë: zgjati rreth dhjetë sekonda, gjatë së cilës ndërtesat lëviznin ndërsa llambadarët lëkundeshin.
Trafiku hekurudhor u pezullua si masë paraprake dhe për kontrolle në linjën e Adriatikut, midis Rimini dhe Varano, në Ankona-Romë, midis Falconara dhe Jesi, dhe në Rimini-Ravena, midis Gatteo dhe Cesenatico.
E njëjta gjë ndodhi edhe me shkollat në disa lokalitete të Ankonës, sidomos në Pesaro./TGCOM
