Uroj që procesi i anëtarësimit për Maqedoninë e Veriut të ndodhë shumë shpejt dhe të mos ketë pengesa të reja, por procesi i reformave të vendit duhet të vazhdojë dhe mund të mbështeteni në përkrahjen e Gjermanisë, tha sot presidenti gjerman Frank-Walter Steinmeier në konferencën e përbashkët për shtyp me kryetarin e shtetit Stevo Pendarovski.
Për sa realist është plani i Qeverisë së Maqedonisë që vendi të bëhet anëtare e BE-së deri në vitin 2030, Steinmeier tha se këtë nuk mund ta parashikojë.
“A do të jetë viti 2030, duhet ta kuptoni, këtë nuk mund ta thotë askush për momentin, as politikanët nga Maqedonia e Veriut, as nga Gjermania, as nga BE-ja. Askush nuk mund të premtojë, por ju duhet të përpiqeni për këtë dhe qëllimi duhet të jetë të përpiqeni ta arrini këtë qëllim. Procesi i reformave këtu në vend duhet të ecë me shpejtësinë që është e nevojshme në aspektin e anëtarësimit në BE, shpresoj që kjo të ndodhë sa më shpejt”, tha Steinmeier.
I pyetur nga një gazetar se si e sheh faktin që “Komisioni Historik përfshihet në negociatat e anëtarësimit”, Steinmeier thotë se tashmë ka folur për kushte të veçanta, pra, siç tha ai, “barra të veçanta” në procesin e anëtarësimit.
“Nën ato barra, mendoj se edhe në të kaluarën ky proces i anëtarësimit ka qenë i lidhur me shumë çështje historike dhe i ka trajtuar ato, ndërsa kur flasim për anëtarësim në BE, në fakt flasim për çështje nga e tashmja dhe për të ardhmen e përbashkët në Europë, kështu që do të doja vetëm të këshilloja – që theksi duhet vënë në atë drejtim, jo në të kaluarën dhe të mos kërkojmë pengesa të reja”, tha Steinmeier.
Kreu i shtetit gjerman tha gjithashtu se gjatë vizitës së tij në vend, jo vetëm do t’i drejtohet Kuvendit, por do të ketë edhe një takim me deputetë të partive të ndryshme politike.
