Lufta midis Rusisë dhe Ukrainës mund të përfundojë vetëm përmes negociatave, tha presidenti francez Emmanuel Macron.
“Unë dua humbjen e Rusisë në Ukrainë dhe dua që Ukraina të jetë në gjendje të mbrojë pozicionin e saj, por jam i bindur se fundi i konfliktit përfundimisht nuk do të arrihet ushtarakisht”, tha Macron për “France Inter”.
“Asnjëra palë nuk mund të mbizotërojë plotësisht. Sepse efektet e mobilizimit nuk janë aq të mëdha sa pritej pasi ka kufizime kapacitetesh”, tha Macron.
Macron përsëriti se Ukraina ka nevojë për një ofensivë ushtarake për ta rikthyer Rusinë në tryezën e bisedimeve.
Megjithatë, ai nuk beson se Rusia duhet të sulmohet në tokën e saj, siç kanë sugjeruar disa liderë.
“Mbi të gjitha, këta vëzhgues duan të shtypin Rusinë. Ky nuk ka qenë dhe nuk do të jetë kurrë qëndrimi i Francës”, theksoi Macron.
Macron shprehu dyshime për mundësinë e një presioni të rëndësishëm të brendshëm në Rusi për t’i dhënë fund konfliktit.
“A mendojmë sinqerisht se një zgjidhje demokratike do të dalë nga shoqëria civile ruse, pas disa vitesh ngurtësimi dhe konflikti? Unë me të vërtetë e uroj këtë, por nuk e besoj vërtet”, tha Macron.
