Ish-ambasadori amerikan në Shkup, Xhes Baily, thotë se ndryshimet kushtetuese janë zgjidhje e qartë për veton bullgare, por se do të jetë zhgënjim nëse në të ardhmen do të ketë një veto të re që do të bllokojë rrugën drejt Bashkimit Europian.
Bejli në një intervistë për Zërin e Amerikës në gjuhën maqedonase thotë se është optimist se vendi do të hyjë në BE, por se nuk mund të thotë se kur do të ndodhë.
“Unë mendoj se Shtetet e Bashkuara do të zhgënjeheshin nëse do të ndodhnin veprime të mëtejshme të kësaj natyre. Ndërsa kaloni procesin dhe hapni kapitujt, disa vende do të duan të sigurohen që vetë kriteret janë përmbushur, kështu që do të ketë pyetje të tjera gjatë rrugës. Dhe kështu mendoj se është e rëndësishme që çdo çështje të mos shihet si një çështje jolegjitime midis shteteve anëtare, sepse kjo është pjesë e procesit. Do të jetë një proces i gjatë për të kaluar nëpër disa nga ata kapituj, veçanërisht për sundimin e ligjit. Vendi do të jetë nën mbikëqyrje të madhe, kjo është e qartë, ashtu si Shqipëria dhe të tjerët. Por mendoj se jam optimist. Unë mendoj se njerëzit do ta shohin këtë të ndodhë. Por nuk mund të them se kur”, tha Baily.
Ai thotë se Marrëveshja e Prespës, sikurse edhe amendamentet kushtetuese tani, është kritikuar në fillim, por që askush nuk e konteston më rezultatin pozitiv të saj.
Ish-ambasadori në vend mendon se ndryshimet kushtetuese do ta forcojnë pozitën e shtetit, ndërsa problemi i Bullgarisë është se nuk e njeh pakicën maqedonase përkundër vendimeve të Gjykatës në Strasburg.
“Ata kanë sistemin e tyre. Nuk e kuptoj pse dikush nuk do të njihte një grup në vend. Une nuk e di. Çdo vend ka mënyra të ndryshme për ta bërë atë. Maqedonia e Veriut është një vend shumë gjithëpërfshirës në këtë drejtim, dhe gjithmonë ka qenë, dhe mendoj se amendamenti kushtetues i propozuar tani vetëm e rrit atë, kështu që nëse Bullgaria vendos të mos e bëjë, mirë, ky është problemi i saj”, thotë Baily.
