Britania e Madhe alarmohet për përhapjen e omicron

Zyrtarët shëndetësorë në Britaninë e Madhe thanë sot se po rrisin nivelin e alarmit për COVID për shkak të “përhapjes së shpejtë” të infeksionit me koronavirus omicron.

Niveli i alarmit ngrihet nga niveli i tretë në të katërtin, që është niveli i dytë më i lartë dhe do të thotë se “transmetimi i virusit është intensifikuar dhe se presioni ndaj shërbimeve shëndetësore është i përgjithshëm dhe i madh ose është në rritje”.

Të dhënat e para tregojnë se versioni i omicron përhapet shumë më shpejt se delta dhe se mbrojtja që ofron vaksina në rast infektimi me omicron është e reduktuar”, theksojnë ata.

Edhe pse nuk dihet ende se sa i rrezikshëm është omicron – do të jetë “më e qartë në javët në vijim” – ekspertët theksojnë se “tashmë” ka shtrime në spital për omicron dhe se “ka gjasa” që numri i tyre “të përhapet shpejt”.

Kryeministri Boris Johnson do t’i drejtohet publikut në një deklaratë të regjistruar më parë të dielën, tha Downing Street.

Ai duhet të raportojë mbi përpjekjet e qeverisë për të frenuar përhapjen e omicron, veçanërisht duke shtrirë fushatën e vaksinimit për ata mbi 30-vjeç nga e hëna.

Ministria e Shëndetësisë njoftoi gjithashtu sot se kontakteve të individëve plotësisht të vaksinuar që rezultuan pozitivë për COVID-19 nga e marta do t’u kërkohet të kryejnë një test antigjeni çdo ditë për një javë. Ata që nuk janë vaksinuar duhet të qëndrojnë në izolim për dhjetë ditë.

Ky informacion vjen pas masave të reja të shpallura nga Johnson, duke përfshirë kthimin nga puna nga shtëpia dhe futjen e lejeve për COVID për disa vende, të cilat do të votohen nga deputetët të martën.

Britania e Madhe është goditur rëndë nga një pandemi me më shumë se 146.000 vdekje dhe rreth 50.000 infeksione të reja në ditë.

Share: