Kurti fton qytetarët serbë që t’i regjistrojnë veturat me targa “RKS”

Kryeministri i Kosovës, Albin Kurti, teksa u është drejtuar qytetarëve serbë të Kosovës, u ka bërë thirrje rreth vendimit të qeverisë që targat ilegale t’i ndërrojnë në ato të Republikës së Kosovës (RKS), në qëllim të vendosjes së ligjshmërisë.

Me anë të një videomesazhi të publikuar në Facebook, Kurti ka thënë se me ndërrimin e targave “garantohet mbisundimi i ligjit krahas politikës dhe interesave indivduale”.

“Në 34 qendra tjera komunale regjistrimi, do të jetë i organizuar procesi i regjistrimit të mjeteve, e me këtë kalimi nga tabelat ilegale në ato të vlefshme në bazë të ligjeve të Republikës së Kosovës, tabela me shenjën ‘RKS’. Në këtë mënyrë garantojmë mbisundim të ligjit krahas politikës dhe interesave individualë, gjë e cila është në interes të çdo qytetari të shtetit tonë të përbashkët”, ka thënë ai.

Sipas kryeministrit Kurti, gjatë regjistrimit të parë nuk do kërkohet kontrolli teknik, kurse komunat mund të vendosin të mos kërkojnë pagesën prej 10 eurove në bazë të taksës komunale.

“Ministria jonë e Punëve të Brendshme do të nxjerrë Udhëzim Administrativ që do të rregullojë detajisht çdo hap”, është shprehur Kurti.

Kryeministri i Kosovës, Albin Kurti

Kreu i qeverisë ka njoftuar për procedurat e regjistrimit të veturave, që sipas tij janë të lehta.

“Ju do regjistroni veturat në bazë të procedurave të lehta dhe me lëshime të lejuara, sipas rregullave dhe ligjit, kurse ne do të vendosim barazinë të cilën e synojmë të gjithë në çdo segment”, shtoi ai.

Ndryshe, të mërkurën e 29 qershorit, qeveria mori vendim që banorëve, kryesisht në veri të vendit që kanë targa të lëshuara nga Serbia, por në emër të qyteteve të Kosovës, t’ua japë edhe një shans, për kthim në targa RKS.

Sipas këtij vendimi, regjistrimi do të nisë në fillim të gushtit dhe do të zgjasë deri më 31 shtator.

Ndërkaq, në shtatorin e vitit 2021, qeveria kishte vendosur reciprocitet për targa të veturave.

Që atëherë, veturat me targa të Serbisë që futen në Kosovë duhet të mbulojnë simbolin shtetëror.

Stay Connected

0FansLike
0FollowersFollow

TË FUNDIT