Presidenti turk Rexhep Tajip Erdogan i ka kërkuar Vladimir Putinit, të tërheqë ushtrinë nga zonat e pushtuara në Krime, siç pohoi ai vetë në një intervistë për mediat amerikane.
Rexhep Taip Erdogan, President i Turqisë: Për të arritur një marrëveshje për rikthimin e paqes në Ukrainë, sigurisht që rikthimi i tokave të pushtuara është shumë i rëndësishëm. I kemi kërkuar të rikthejë edhe Krimenë tek pronarët e ligjshëm.
Kërkesën, Erdogan ia bëri Putinit në samitin e Uzbekistanit zhvilluar javën e kaluar mes vendeve të Organizatës së Bashkëpunimit të Shangait. Kreu i shtetit turk, që gjatë krizës ukrainase ka marrë rolin e ndërmjetësuesit mes Putinit dhe aleatëve perëndimorë tha se Putin ka hedhur hapa konkretë në këtë drejtim.
Se cilët janë hapat konkretë, këtë Erdogan nuk e sqaroi, por në terren ndodh e kundërta. Në parlamentin rus jo vetëm që nuk diskutohet tërheqja, por deputetë të partive të ndryshme propozojnë që në rajonet e pushtuara si Luhansku e Donjecku, të ndiqet modeli i Krimesë që u aneksua në 2014-ën.
Ndërsa krerët e administratës së vendosur nga pushtimi rus në Herson i bënë thirrje Kremlinit të ndihmojë në mbajtjen e një referendumi që rajoni t’i bashkëngjitet shumë shpejt Federatës Ruse.
