Po bëhen përpjekje që mësimi në shkollat fillore dhe të mesme në periudhën dimërore të zhvillohet me prezencë fizike, tha sonte ministri i Ekonomisë Kreshnik Bekteshi.
“Është përgjegjësi e komunave, por fëmijët humbën shumë gjatë pandemisë kovid dhe tani për shkak të krizës energjetike është më mirë të ndihmohen shkollat sesa t’i lëmë fëmijët të humbasin shumë. Konsumi për pesë muajt, nga nëntori deri në mars, për të gjitha shkollat në nivel shtetëror është rreth 10 gigavat orë dhe këtë mund ta sigurojmë përmes ESM-së dhe jam i bindur se do të gjejmë një zgjidhje, tha Bekteshi në televizionin Sitel.
Sipas vlerësimeve të tij, shkollat nuk duhet të kenë problem deri në fund të marsit.
Nuk është serioze, vlerëson Bekteshi, që 2487 persona juridikë në vend ende nuk kanë lidhur kontrata për furnizimin me energji elektrike. Prej tyre, 60 për qind janë nën juridiksionin e pushtetit vendor.
Nuk është e drejtë që shkollat të mbeten pa furnizues me energji elektrike, sepse kur nuk ke furnizues me energji elektrike dhe çmimi në bursë është 400 euro, automatikisht duhet të paguajnë 600 euro që të mos mbeten objektet të pafurnizuara me energji elektrike. Të gjitha subjektet juridike i kanë ditur afatet kur u skadon kontrata, ka theksuar Bekteshi, duke shtuar se prokurimi i energjisë elektrike për shkollat është përgjegjësi e komunave.
