“Maqedonia e Veriut ka shënuar progres të caktuar drejt rrugës eurointegruese, por duhet akoma të vazhdojë me reformat, ndërkaq me përfundimin e skriningut do të detektohen më së miri fushat ku duhet të intensifikohen agjenda reformuese”, thotë euroambasadori David Geer.
Megjithatë, ai potencon se fqinjësia e mirë është politika kryesore e aderimit, duke shtuar nevojën e implementimit të plotë të marrëveshjeve me Bullgarinë dhe Greqinë.
“Është me rëndësi të dihet se në të gjitha proceset aderuese, për çdo shtet, edhe në të kaluarën edhe tash, çështja e fqinjësisë së mirë është shumë e rëndësishme. Në kontekst të këtij shteti, raporti i fqinjësisë së mirë do të thotë implementimi i marrëveshjeve me Greqinë dhe Bullgarinë nën frymën e besimit dhe atmosferës së mirë nga ana e të gjithë të involvuarve. Pra do ta përsëris tri herë: reforma, reforma, reforma, sepse qytetarët duan përfundimisht ta shohin vendi në BE.”, deklaroi euroambasadori, David Geer.
Euroambasadori Geer u ndal edhe në pjesëmarrjen e shtetit tonë në mbledhjen e parë të Bashkësisë Politike Evropiane në Pragë. Sqaron se kjo bashkësisë nuk është asnjë lloj zëvendësimi apo alternativë e procesit aderues për Maqedoninë e Veriut.
