Koordinatori i grupit parlamentar të Bashkimit Demokratik për Integrim, Arbër Ademi në një prononcim për bild.mk ka shprehur sot qëndrimin e deputetëve të subjektit të tij sa i përket ndryshimeve kushtetuese që kanë të bëjnë me heqjen e termit “20%” dhe zëvendësimin e tij me fjalët adekuate “Gjuha shqipe” dhe “Populli shqiptar”. Sipas Ademit, ka ardhur koha që një gjë e tillë të realizohet.
“Është e vërtetë se gjatë javës së kaluar, kryetari Ali Ahmeti ka patur një takim me kryetarin e PDSH-së, z. Menduh Thaçi lidhur me këtë çështje, por edhe për aktualitetin politik në vend. Kanë diskutuar për heqjen e formulimit matematikor që ka të bëjë me 20 % dhe zëvendësimin e të njejtit formulim me formulim adekuat siç është “Populli shqiptar” dhe “Gjuha shqipe”, si dhe konsultat do të vazhdojnë me të gjithë faktorët relevant në vend, për arsye se të gjitha të arriturat në të gjitha dimensionet në vendin tonë janë si rezultat i partneritetit të ngushtë edhe me miqtë tanë, përfshirë këtu edhe formulimet të cilat rrjedhin nga Marrëveshja Paqësore e Ohrit duke marrë për bazë praktikat më të mira ndërkombëtare” – u shpreh Ademi.
Ademi ka komentuar edhe qëndrimin e shprehur të kreut të VMRO DPMNE-së, Hristijan Mickoski për heqjen e mekanizmave të “Badenterit” dhe “Balancuesit” sëbashku me formulimin joadekuat “20%” duke e cilësuar se gjë e pamundur dhe se nuk mund të ketë kthim prapa sa i përket zbatimit të kritereve që evituan fenomenet e majorizimit për të gjitha çështjet që i prekin bashkësitë tjera etnike dhe diskriminimit.
“Shumica e badenterit, apo shumica e dyfishtë, vetëm sa për të rikujtuar, një mekanizëm i tillë u parashikua për të evituar majorizimin për të gjitha çështjet të cilat i prekin bashkësitë e tjera, jo-maqedonase dhe sigurisht se kthim mbrapa nga e njëjta zgjidhje nuk mund të ketë. Deri para vitit 2001, ne e dijmë se sa shqiptarë e sa pjesëtarë të komuniteteve tjera ishin pjesë e sektorit publik, administratës shtetërore dhe sa janë tani. Vetë balacuesi duhet të jetë funksional, madje edhe ta mbindërtojmë që mos të ketë keqpërdorime sa i përket implementimit të këtij mekanizmi e assesi nuk mund të diskutohet për abrogimin ose shfuqizimin e kësaj zgjidhje” – potencoi Ademi.
VIDEO : https://fb.watch/gnHCczZi4R/
