Kryetari i Bashkimit Demokratik për Integrim, Ali Ahmeti ka marrë pjesë sot në ngjarjen e organizuar nga Universiteti i Tetovës për shënimin e 114 vjetorit të Kongresit të Manastirit, me ç’rast janë përuruar tre amfiteatrot e reja që do të mbajnë emrat e veprimtarëve të arsimit në gjuhën shqipe, Abdyselam Emini, Rafi Halili, Sevasti dhe Parashqevi Qiriazi.
Përmes një postimi në faqen e tij në rrjetin social Facebook, Ahmeti ka shprehur rëndësinë e këtij veprimi duke potencuar se i njejti do të shërbejë si përkujtim dhe frymëzim për studentët në rrugën e tyre të dijes.
“Në universitete ruhet më së miri gjuha, aty në edukimin dhe arsimimin e gjeneratës së re dëshmohet madhështia e saj, aty merr kuptimin çdo përpjekje dhe sakrificë për përjetësinë e saj!
Kënaqësi e veçantë që sot në Universitetin e Tetovës bashkë me studentët rikujtuam angazhimin intelektual të rilindasve në Kongresin e vitit 1908 në Manastir dhe përuruam tre amfiteatrot që do të mbajnë emrat e veprimtarëve të arsimit shqip – Abdylselam Eminit, Rafi Halilit, Sevasti dhe Parashqevi Qiriazit.
Uroj që këto emra të vendosur në hyrje të këtyre amfiteatrove të jenë frymëzim i përditshëm për të rinjtë tanë në rrugëtimin e tyre të dijes, rikujtim i përgjegjësisë madhore të ruajtjes së vlerave kombëtare!” – është shprehur Ahmeti.
