Duke dashur të taktizojë politikisht, Lëvizja Besa bëri gabim, që hyri në mes të kalkulimeve politike të Levicës dhe VMRO-DPMNE-së, thotë në deklaratë për Indeks.mk, analisti politik Besim Nebiu, duke komentuar kushtëzimet dhe kundërshtimet e opozitës maqedonase dhe Lëvizjes BESA ndaj ndryshimeve kushtetuese, që janë kusht për vazhdimin e mëtejmë të “ëndrrës” evropiane të Maqedonisë së Veriut.
“Në skenën politike maqedonase ekziston një parti parlamentare haptazi pro-ruse, por kjo nuk është kufiri i influencës pro-ruse nëpër parti. Duket se Levica, si parti haptazi pro-ruse, është duke e tërhequr VMRO-në në ekstremin e djathtë, duke luftuar për votën e votuesit pro-rusë e anti-perëndimorë në kampin maqedonas. VMRO është e detyruar të luajë lojën e Levicës, për të mos e humbur këtë lloj votuesi. Besoj se Lëvizja Besa, duke dashtë të taktizojë, bëri gabim që hyri në hesapet e Levicës dhe VMROsë. Por sidoqoftë, me tre deputetët e saj Besa patjetër se do votonte për ndryshime të kushtetutës dhe zhbllokim të negociatave, për dallim nga Levica dhe VMRO DPMNE”, deklaroi Nebiu.
