Faktori ndërkombëtar është i vendosur që Maqedonia e Veriut nuk duhet të lëvizë nga rruga e saj e përcaktuar proevropiane dhe proamerikane, andaj ditëve të fundit është rritur edhe presioni ndaj drejtuesve politikë për të përshpejtuar procesin e ndryshimeve kushtetuese, thotë në një prononcim për Indeks.mk, Berat Azizi – analist politik.
“Ditëve të fundit ndërkombëtarët kanë rritur presionin ndaj drejtuesve politikë të Maqedonisë së Veriut, për të përshpejtuar hapat drejt ndryshimeve Kushtetuese. Zyrtari i lartë amerikan, Derek Scholl ka ardhur me një porosi të qartë që ndryshimet kushtetuese duhet të ndodhin për të hapur rrugën e integrimit në Bashkimin Evropian. Në të njëjtën vijë janë edhe zyrtarët evropianë, të cilët kanë intensifikuar takimet me subjektet politike në vend për të siguruar kështu numrin e nevojshëm të votave për të kaluar ndryshimet kushtetuese”, deklaroi Azizi.
Edhe pse në sfond duket e pamundur të sigurohen 80 vota, ai beson se surprizat do të jenë të rezervuara në orët e fundit dhe ndryshimet kushtetuese do të kalojnë.
“Një gjë tashmë është e qarë se subjektet politike shqiptare do të votojnë “për” dhe të çojnë vendin drejt BE-së. Në anën tjetër ditëve të fundit kemi edhe një heshtje në partinë më të madhe maqedonase, VMRO-DPMNE, e cila ka qenë shumë e zëshme kundër, por ndoshta presioni ndërkombëtar do t’i vënë para një sprove të vështirë dhe do të gjejnë formë për të votuar “për”. Nuk është e thënë që gjithë subjekti të votojë për ose kundër, mjafton vetëm 6 vota nga kjo parti të kalojnë në anën e shumicës dhe ndryshimet kushtetuese do të kalojnë”, theksoi ai.
Ndryshe, nderyshimet kushtetuese me të cilat parashikohet që të futet komuniteti bullgar dhe disa komunitete tjera në Preambulën e Kushtetutës, e që janë të domosdoshme për ecurin e mëtejme të vendit drejt BE-së, deri më tani janë kundërshtuar nga VMRO-DPMNE dhe Levica, ndërsa atyre u është bashkuar edhe Lëvizja BESA, duke i kushtëzuar ato me zgjedhje të parakohshme parlamentare, me çka frenohet procesi eurointegrues./Indeks.mk/
