“Në aspekt bilateral, do të kemi një vit shumë të stuhishëm, joproduktiv”, tha për BNR eurodeputeti Ilhan Kyuchyuk nga “Ripërtrije Europën”, reporter për Maqedoninë e Veriut në Parlamentin Evropian, transmeton bild.mk .
Sipas fjalëve të tij, rikthimi i vetos për Republikën e Maqedonisë së Veriut do të ishte një gabim i madh.
“Ky do të ishte një gabim i madh. Vetoja nuk ndikoi në asnjë mënyrë në marrëdhëniet e mira fqinjësore. Krejt e kundërta. Filluan lloje të ngjashme provokimesh, pak a shumë, që nga vendosja e vetos”.
Ajo që ndodhi me Hristijan Pendikov është për t’u dënuar dhe këtë e treguan institucionet evropiane, beson Kyuchuk. Ai e cilësoi tensionin mes dy vendeve si të lartë dhe shtoi se “nuk po ulet në shumë drejtime”.
Eurodeputeti theksoi edhe mekanizmin për monitorimin dhe “matjen” e gjuhës së urrejtjes, duke theksuar se ministri i Jashtëm i Maqedonisë së Veriut, Bujar Osmani, ka krijuar një “ekip të madh, ku do të përfshihen edhe përfaqësues të komunitetit bullgar”.
I pyetur se si do të reagonte Brukseli nëse Shkupi do t’i pengonte eurodeputetët bullgarë, politikanët dhe anëtarët e publikut të merrnin pjesë në ngjarjet lidhur me Goce Dellçev në fillim të shkurtit, Ilhan Kyuchuk u përgjigj:
“Nuk ka mundësi që institucionet evropiane të inkurajojnë një sjellje të tillë nga ana e autoriteteve maqedonase. Brukseli, as Strasburgu nuk mund ta pranojnë këtë si një qasje normale”.
“Nuk mund t’i konsiderojmë rastet si të izoluara. Megjithatë, së bashku me këtë, ne duhet të kërkojmë mekanizma që janë të qëndrueshëm. Duhet të ketë mekanizma monitorues në kuadër të marrëdhënieve dypalëshe”, tha Ilhan Kyuchyuk.
Ka shumë shembuj të vendeve me marrëdhënie të vështira historike – Sllovenia dhe Kroacia, Sllovenia dhe Italia. Nga pikëpamja e kujtesës historike kjo nuk është diçka e re, theksoi eurodeputeti.
