Komisioni i Etikës ka marrë vendim për përjashtimin me 10 ditë nga seancat plenare për kreun e Partisë Demokratike Sali Berisha dhe deputetin Flamur Noka dhe nga 5 ditë për Edi Palokën dhe Belind Këlliçin.
Këto masa, erdhën pas kërkesës së bërë nga Partia Socialiste, pasi në seancën e fundit plenare që u mbajt ditën e hënë, deputetët e opozitës bllokuan punimet e Kuvendit.
Para se “Etika” të merrte këtë vendim, Noka dhe Këlliçi deklaruan jashtë ambienteve të Kuvendit se do të jenë të pranishëm në seancën e nesërme pavarësisht.
Mes të tjerash, Noka, tregoi një video të mazhorancës së sotme gjatë kohës kur ishte në opozitë. Sipas tij deputetët aktualë të mazhorancës kishin bërë të njëjtat veprime duke ndërprerë seancën parlamentare me bilbilë dhe megafonë dhe pavarësisht kësaj, ndaj tyre nuk ishte marrë masë disiplinore.
