I dërguari i Posaçëm, Miroslav Lajçak, ka njoftuar për takimet e zhvilluara të premtën, me liderët e partive opozitare në Kosovë.
Lajçak tha se në këto takime pati për qëllim që t’ua sqarojë marrëveshjen dhe hapat e ardhshëm në kuadër të saj.
“Në ditën e dytë të qëndrimit në Kosovë, u takova me liderët e partive kryesore opozitare, për t’ua shpjeguar Marrëveshjen, si dhe hapat e radhës”, shkroi Lajçak në Twitter.
Në njoftimin e tij, Lajçak la edhe një porosi.
“E bëra shumë të qartë pritjen e komunitetit ndërkombëtar për ta vendosur dialogun mbi politikat ditore, veçanërisht në këtë moment kritik”, tha tutje.
Ai tregoi se, në Prishtinë, u takua edhe me ministrin e Brendshëm, Xhelal Sveçla, me të cilin tha se ishte e rëndësishme që të bashkëpunohet ngushtë.
Gjatë qëndrimit të tij, emisari evropian i shkoi në zyrë edhe përfaqësuesve të Listës Serbe. Me ta, Lajçak tregoi se ka folur për procesin e dialogut, si dhe ka marrë vlerësimet e tyre për situatën në veri të Kosovës.
