Alternativa për Ndryshim ka marrë vendim për pjesëmarrje në zgjedhjet parlamentare të 25 tetorit në Serbi, ndërsa ka nominuar kryetarin e saj, Visar Memeti, për kandidat për deputet.
Në mbledhjen e Këshillit Qendror të partisë, ndër pikat kryesore të rendit të ditës ishte angazhimi i Alternativës në procesin zgjedhor dhe përcaktimi i kandidaturës për deputet. Pas diskutimeve, Këshilli Qendror vendosi që Visar Memeti të jetë kandidat nga radhët e kësaj partie.
Pavarësisht këtij vendimi, Alternativa për Ndryshim vazhdon të mbështesë idenë që partitë shqiptare në këto zgjedhje të paraqiten me një listë të përbashkët, duke vlerësuar se bashkimi i forcave politike do të siguronte një përfaqësim më të fuqishëm të shqiptarëve.
Edhe Partia për Veprim Demokratik, në mbledhjen e Këshillit Qendror të mbajtur javë më parë, ka nominuar kryetarin e saj dhe deputetin aktual, Shaip Kamberi, si kandidat për deputet popullor.
Megjithatë, ende nuk dihet nëse partitë shqiptare do të arrijnë marrëveshje për një listë të përbashkët apo do të orientohen drejt dy listave zgjedhore.
Kjo çështje pritet të qartësohet pas kthimit të kryeministrit të Kosovës, Albin Kurti, nga Shtetet e Bashkuara të Amerikës, ku aktualisht po qëndron për vizitë./LUGINALAJMI/
